کراچی: ایم کیو ایم کے سینئر ڈپٹی کنوینر عامر خان نے کہا ہے کہ وفاقی حکومت سے امید ختم ہوچکی ہے لہٰذا اتحاد ختم بھی کرلیں تو بھی حکومت نہیں گراسکتے۔
ایم کیو ایم کے رہنما عامر خان نے گلستان جوہر میں پی ایس 88 کے ضمنی انتخابات کے لیے الیکشن آفس کے افتتاح کے بعد میڈیا سے گفتگو کرتے ہوئے کہا کہ 2013 میں پورے ملک میں یہ سوچ پیدا کی گئی تھی کہ پی ٹی آئی تبدیلی لے کر آئے گی مگر افسوس سے کہنا پڑرہا ہے کہ کرپشن کے خلاف جو نعرہ تھا جو ٹرانسپیرنسی انٹرنیشنل کے رپورٹ کے برعکس ہے جس میں بدعنوانی چار گنا بڑھنے کا انکشاف کیا گیا ہے، اس طرح تو تبدیلی نہیں آسکتی، ایم کیو ایم نے تمام کوششیں کرلیں، ہر حکومت کا ساتھ دیا مگر شہر کے مسائل کے حل کے لیے کوئی سنجیدہ نہیں ہے۔
انہوں نے کہا کہ گرین لائن ہم نے شاہد خاقان عباسی سے منظور کرائی تھی، پچیس ارب روپے لگائے بھی گئے تھے، نئے فائر ٹینڈر بھی اسی دور کے فنڈز سے خریدے گئے ہیں اس کا کریڈٹ کوئی نہیں لے سکتا۔
عامر خان نے کہا کہ اعلانات تو ہم نے 162 ارب روپے کے بھی سنے ہیں اس کے بعد 1100 ارب روپے کے دعوے بھی کیے گئے اس کا بھی کوئی پتہ نہیں ہے۔ انھوں نے پوچھا کہ ایم کیو ایم کو دفن کرنے کے دعوے کہاں چلے گئے؟، ہمارے نتائج چھینے گئے ہیں، نظام کو نقصان نہ پہنچے اسی لیے پی ٹی کا ساتھ دے رہے ہیں۔
انھوں نے کہا کہ ہم تو اتحاد برقرار رکھنا چاہتے ہیں مگر مسائل حل نہ ہوئے تو فیصلہ عوام کے ہاتھوں میں ہوگا۔ عامر خان نے کہا کہ قومی اسمبلی کے 7 اراکین لے کر ہم علیحدہ بھی ہوجائیں تب بھی حکومت نہیں گراسکتے اس کی وجہ نظام کی خرابی ہے۔
The post ہم اتحاد ختم بھی کرلیں تو حکومت نہیں گراسکتے، ایم کیو ایم appeared first on ایکسپریس اردو.
from ایکسپریس اردو » پاکستان https://ift.tt/3cBukOr
