لاہور / اسلام آباد: ن لیگ کے صدر شہبازشریف کی میزبانی میں اپوزیشن جماعتوں کی آل پارٹیز کانفرنس آج صبح ساڑھے 11 بجے مری میں کشمیر پوائنٹ میں نوازشریف کی رہائش گاہ پر ہوگی۔
ذرائع کے مطابق متحدہ مجلس عمل کا وفد مولانا فضل الرحمن اورشاہ اویس نورانی کی قیادت میں آج مری میں پاکستان الائنس کے مشاورتی اجلاس میں بھرپور شرکت کرے گا۔ موثر اپوزیشن اور مینڈیٹ کی چوری کے حوالے سے احتجاجی حکمت عملی پر بھی تبادلہ خیال کیا جائے گا۔
پیپلزپارٹی کے رہنما خورشید شاہ نے جمعیت علمائے اسلام (ف) کے سربراہ مولانا فضل الرحمن سے رابطہ کیا اور اپوزیشن کی طرف سے مشترکہ صدارتی امیدوارلانے پر بات چیت کی ہے۔ ذرائع کے مطابق دونوں رہنماؤں نے مشترکہ صدارتی امیدوارلانے کیلیے بھرپورمہم چلانے کا عزم ظاہر کیا ہے۔
پیپلز پارٹی کے رہنما فرحت اللہ بابر نے بتایاکہ 2014 میں ن لیگ کی جمہوریت کو خطرہ ہوا تو اعترازاحسن جمہوریت کے دفاع میں سب سے آگے تھے۔ انھوں نے اعتراف کیا کہ ن لیگ اور پیپلزپارٹی کے درمیان تلخیاں ہیں۔
ن لیگ کے رہنما رانا ثنا اللہ نے بتایاکہ تمام اپوزیشن جماعتوں کو متفقہ طور پر فیصلہ کرنے کی ضرورت ہے، ہر پارٹی کو حق حاصل ہے کہ وہ صدارتی امیدوار پیش کرے۔ رانا ثنا نے کہا کہ نواز شریف کے ساتھ جس طرح کا برتاؤ ہورہا ہے وہ پوری دنیا دیکھ رہی ہے،عید کے بعد پہلا جلسہ راولپنڈی میں ہوگا، راولپنڈی کے جلسے میں تمام اپوزیشن جماعتوں کو دعوت دی جائے گی۔
The post متفقہ صدارتی امیدوار کیلئے مشاورت؛ اپوزیشن جماعتوں کی اے پی سی آج ہوگی appeared first on ایکسپریس اردو.
from ایکسپریس اردو » پاکستان https://ift.tt/2NfR3QG
