خواتین کرکٹرز آج سے ایکشن میں ہوں گی

 کراچی:  کراچی میں خواتین کرکٹرزمنگل سے ایکشن میں ہوں گی۔

پی سی بی ڈپارٹمنٹل ویمنز ٹی 20 کرکٹ ٹورنامنٹ کی ٹرافی کی رونمائی پیرکوکردی گئی، نیشنل اسٹیڈیم میں حنیف محمد ریجنل اکیڈمی میں منعقدہ تقریب میں ایونٹ میں شریک چاروں ٹیموں کی کپتانوں نے شرکت کی اوراظہار خیال کیا۔ ان میں زیڈ ٹی بی ایل کی ثنامیر، پی سی بی الیون کی رامین شمیم، ایچ ای سی کی فضیلہ اخلاق اور اسٹیٹ بینک کی عالیہ ریاض بھی شامل رہیں۔

منگل سے شروع ہونے والے ایونٹ کو ایشین ویمن ٹی 20کرکٹ چیمپئن شپ کے ٹرائلز کی حیثیت بھی حاصل ہے، بہترین کارکردگی کا مظاہرہ کرنے والی کرکٹرز ایشین ایونٹ کیلیے پاکستانی اسکواڈ کا حصہ بنیں گی۔

تقریب رونمائی میں قومی ویمن سلیکشن کمیٹی کے سربراہ و سابق ٹیسٹ کرکٹر جلال الدین، پی سی بی ویمن ونگ کی جی ایم عائشہ اشعر اور کوچ شاہد اسلم سمیت دیگر بھی شریک ہوئے، منگل کو افتتاحی میچز میں اسٹیٹ بینک کی ٹیم ایچ ای سی کیخلاف میدان میں اترے گی، دن کا دوسرا مقابلہ زیڈ ٹی بی ایل اورپی سی بی الیون کے درمیان ہوگا۔

بورڈ کی جانب سے جاری کردہ شیڈول کے مطابق بدھ 2 مئی کو ایچ ای سی کا ٹاکرا پی سی بی الیون کے ساتھ رکھا گیا ہے جبکہ اسٹیٹ بینک کی ٹیم زیڈ ٹی بی ایل سے نبرد آزما ہوگی، 4 مئی کو زیڈ ٹی بی ایل کی ٹیم ہائر ایجوکیشن کمیشن کی ٹیم کے مقابل آئے گی، دن کا دوسرا مقابلہ اسٹیٹ بینک اور پی سی بی الیون میں ہوگا، 5مئی کو زیڈ ٹی بی ایل کا میچ پی سی بی الیون جبکہ اسٹیٹ بینک کا مقابلہ ایچ ای سی کے ساتھ ہوگا۔

ایک دن کے وقفے کے بعد ایونٹ کے مزید 2میچز کھیلے جائیں گے، جس میں اسٹیٹ بینک کی ٹیم زیڈ ٹی بی ایل کے خلاف میدان میں اترے گی جبکہ ایچ ای سی کا میچ پی سی بی الیون کے ساتھ ہوگا۔8 مئی کواسٹیٹ بینک کا مقابلہ پی سی بی الیون جبکہ زیڈ ٹی بی ایل کا میچ ایچ ای سی سے شیڈول کیاگیا ہے، چیمپئن شپ کا فائنل مقابلہ 10 مئی کو طے کیاگیا ہے۔

The post خواتین کرکٹرز آج سے ایکشن میں ہوں گی appeared first on ایکسپریس اردو.

from ایکسپریس اردو » کھیل https://ift.tt/2HCxyTn