دی ہیگ: امریکا نے عالمی فوجداری عدالت کے ججز کو گرفتار اور ان پر پابندیاں عائد کرنے کی دھمکی دے دی ہے۔
بین الاقوامی خبر رساں ادارے کے مطابق امریکی صدر کے مشیر برائے قومی سلامتی جان بولٹن نے انٹرنیشنل کرائم کورٹ کو غیر آئینی قرار دیتے ہوئے کورٹ پر پابندیاں عائد کرنے کا عندیہ دیا ہے۔ انہوں نے کورٹ پر امریکیوں کے ساتھ امتیازی سلوک برتنے کا بھی الزام عائد کیا۔
امریکی مشیر جان بالٹن کا مزید کہنا تھا کہ امریکا اپنے شہریوں، رضاکاروں اور افسران کی حفاظت کرنا جانتا ہے اور ہماری پہلی ترجیح اپنے شہریوں کی حفاظت کرنا ہے جس کے لیے آخری حد تک بھی جانا پڑے تو جائیں گے۔
امریکا کی جانب سے انٹرنیشنل کرائم کورٹ پر پابندیاں عائد کرنے کا معاملہ اُس وقت سامنے آیا ہے جب اس کورٹ میں ایک امریکی افسر کو 2016 میں افغانستان میں قیدیوں کے ساتھ غیر انسانی سلوک اور زیادتی پر مقدمات کا سامنا ہے۔
امریکی مشیر برائے قومی سلامتی کا موقف ہے کہ انٹرنیشنل کرائم کورٹ سے جنگی جرائم پر نہ تو افغانستان نے تحقیقات کی درخواست کی اور نہ عدالت کے چارٹر پر دستخط کرنے والے کسی اور ملک نے اس کیس کو چلانے کا کہا تھا اس لیے عدالت یہ کیس چلانے کی مجاز ہی نہیں۔
دوسری جانب انٹرنیشنل کرائم کورٹ نے دوٹوک موقف اختیار کرتے ہوئے کہا ہے کہ عدالت کو دنیا میں کسی بھی شورش زدہ یا جنگ کے دوران ہونے والی نسل کشی، جنگی جرائم اور انسانیت سوز مظالم پر ازخود مقدمہ چلا سکتا ہے۔
واضح رہے کہ عالمی عدالت برائے انسداد جرائم (International Crime Court) نسل کشی, جنگی جرائم اور انسانیت سوز مظالم کا فیصلہ کرنے لیے 2002 میں قائم کی گئی تھی۔ برطانیہ سمیت 123 ممالک عدالت سے جڑ گئے تاہم امریکا نے خود کو تاحال علیحدہ رکھا ہوا ہے۔
The post ہمارے فوجی کو سزا ہوئی تو عالمی عدالت کے ججز کو گرفتار کرلیں گے، امریکی دھمکی appeared first on ایکسپریس اردو.
from ایکسپریس اردو » انٹر نیشنل https://ift.tt/2MlQ3sM
