لاہور قلندرز کو آج ملتان سلطانز کے چیلنج کا سامنا

لاہور: پی ایس ایل 5میں اتوار کو لاہور قلندرز  ایونٹ کی کامیاب ترین ٹیم ملتان سلطانز کے چیلنج کا سامنا کرے گی جب کہ فتح کی صورت میں فائنل فور تک رسائی کا راستہ بن جائے گا۔

اتوار کو لیگ مرحلے کے آخری 2 میچز مکمل ہونے کے بعد پی ایس ایل  5 کی فائنل فور ٹیموں کا فیصلہ ہوجائے گا، قذافی اسٹیڈیم میں دوپہر 2بجے لاہور قلندرز کا ایونٹ میں اب تک بہترین کارکردگی کا مظاہرہ کرنے والی ٹیم ملتان سلطانز سے مقابلہ ہوگا، میزبان ٹیم نے 9میچز میں 8پوائنٹس حاصل کیے، فتح کی صورت میں سیمی فائنل کھیلنے کا راستہ بن جائے گا۔

کورونا وائرس کی وجہ سے پیدا ہونے والی صورتحال کے باوجود لاہور قلندرز کے غیر ملکی کھلاڑیوں نے وطن واپسی کا فیصلہ نہیں کیا، کپتان سہیل اختر اچھی فارم میں ہیں، فخرزمان، کرس لین، بین ڈنک اور محمد حفیظ میں سے کسی ایک کا بھی بیٹ چل پڑا تو بڑا اسکور ممکن ہوجائے گا،سمت پٹیل اور ڈیوڈ ویسی آل راؤنڈ کارکردگی دکھا سکتے ہیں۔

بولنگ میں ٹیم کو شاہین شاہ آفریدی اور حارث رؤف کی خدمات حاصل ہوں گی،دوسری جانب ملتان سلطانز نے 9میچز میں 8پوائنٹس جوڑے، ٹیم جمعے کو رلی روسو کے بغیر میدان میں اتری اور بیٹنگ مستحکم نظر نہیں آئی، ذیشان اشرف اچھی فارم میں ہیں،کپتان شان مسعود بھی موجود ہوں گے، معین علی اور روی بوپارہ جیسے آل راؤنڈرز بھی اسکواڈ کا حصہ ہیں، سہیل تنویر اور عمران طاہر تجربہ کار بولرز ہیں۔

دوسری جانب نیشنل اسٹیڈیم کراچی میں رات 7بجے میزبان کنگز کا دفاعی چیمپئن کوئٹہ گلیڈی ایٹرز سے مقابلہ ہوگا،عماد وسیم الیون9میچز میں 11 پوائنٹس حاصل کر چکی ہے، شرجیل خان، بابر اعظم، چیڈوک والٹن اور افتخار احمد بڑی اننگز کھیل سکتے ہیں،آل راؤنڈرزکپتان عماد وسیم اور کرس جورڈن جبکہ پیسر محمد عامر بھی موجود ہیں۔

کوئٹہ گلیڈی ایٹرز نے 9 میچز میں 7پوائنٹس حاصل کیے ہیں، متوازن کمبی نیشن کی متلاشی ٹیم کو شین واٹسن اور اعظم خان کی جانب سے غیر معمولی کارکردگی کی ضرورت ہوگی،پیسر محمد حسنین بھی تہلکہ مچا سکتے ہیں۔

 

The post لاہور قلندرز کو آج ملتان سلطانز کے چیلنج کا سامنا appeared first on ایکسپریس اردو.

from ایکسپریس اردو » کھیل https://ift.tt/38SxyYr