لاہور: سابق بھارتی کرکٹر اور سیاستدان نوجوت سنگھ سدھو نے خود پر بھارت میں ہونے والی تنقید کو مسترد کرتے ہوئے کہا ہے کہ پاکستان میں بہت عزت ملی۔
وزیر اعظم عمران خان کی تقریب حلف برداری میں شرکت کے لیے پاکستان آنے والے بھارت کے سابق کرکٹر اورسیاستدان نوجوت سنگھ سدھو لاہور پہنچ گئے جہاں سے وہ واہگہ بارڈر کے ذریعے واپس اپنے ملک چلے جائیں گے۔ پی ٹی آئی رہنما فیصل جاوید اور عبدالحمید پوٹھی نے انہیں رخصت کیا۔ لاہور میں سدھو نے سابق گورنر پنجاب چوہدری محمد سرور سے ملاقات کی اور دونوں کے درمیان پاک بھارت تعلقات پر بات چیت ہوئی۔
نوجوت سنگھ سدھو تقریب حلف برداری میں شرکت کرنے خصوصی طور پر پاکستان آئے تھے اور دوروز قیام کے بعد آج بھارت کے لیے روانہ ہوجائیں گے۔ اسلام آباد سے روانہ ہوتے وقت نوجوت سنگھ سدھو نے بھارت میں ہونے والی تنقید کو مسترد کرتے ہوئے کہا پاکستان میں بہت عزت ملی، عمران خان پُرامن تعلقات چاہتے ہیں، بھارت بھی قدم بڑھائے۔
اس خبرکوبھی پڑھیں: نوجوت سنگھ سدھو جنرل قمر جاوید باجوہ کے گرویدہ
سدھو نے کہا یہاں سے پیار اورعزت لے کر جارہاہوں، پیارسے مالامال محسوس کررہاہوں، پاکستانیوں نے جومحبت دی تاعمر یاد رہے گی، ریگستان کی مٹی پربارش پڑنے سے سوندھی خوشبو آنا اچھا شگن ہے، اچھی شروعات کرکے جارہے ہیں۔
سینیٹر فیصل جاوید خان نے سدھو سے کہا پاک بھارت کرکٹ میچ ہونا چاہیے، جس پر انہوں نے جواب دیتے ہوئے کہا بھارت جا کر پاک بھارت کرکٹ میچ کا آئیڈیا پیش کروں گا، آئی پی ایل اور پی ایس ایل کے ونر کے درمیان میچ اچھا آئیڈیا ہے، فاؤنڈیشن بنا کر اس امید سے جارہے ہیں کہ کوئی اس پرعمارت کھڑی کردے۔
واضح رہے کہ عمران خان کی تقریب حلف برداری میں شرکت کے دوران نوجوت سنگھ سدھو کو خصوصی اہمیت دی گئی اور انہیں اگلی صف میں بٹھایا گیا، جہاں ان کے برابر میں صدرآزاد کشمیر مسعود خان موجود تھے جبکہ انہوں نے آرمی چیف جنرل قمر جاوید باجوہ سے بھی ملاقات کی۔ بھارتی میڈیا کو نوجوت سنگھ سدھو کو پاکستان میں ملنے والی پزیرائی ایک آنکھ نہ بھائی، بھارتی میڈیا نے سدھو کو غدار قرار دے دیا جب کہ ان کے خلاف بھارت میں مظاہرے پھوٹ پڑے ہیں اور ان کے پُتلے بھی نظر آتش کیے گئے ہیں۔
The post سدھو نے بھارت میں ہونے والی تنقید مسترد کردی appeared first on ایکسپریس اردو.
from ایکسپریس اردو » پاکستان https://ift.tt/2OJftCi
